Drejtori i të ashtuquajturës Zyra Për Kosovën në Qeverinë e Serbisë Petar Petkoviç, ka reaguar për marrëveshjen e mbrëmshme, si dhe komenteve që po bëhen për të. Sipas Petkoviç, institucionet në Kosovë, kanë filluar një fushatë sipas tij, që marrëveshjen për Asociacionin ta implementojnë sikurse një organizatë joqeveritare, mirëpo për Petkoviç është e qartë se marrëveshja e parë në Bruksel për të, kishte të bënte me vetëmenaxhimin e serbëve në Kosovë, dhe se nuk do të ketë lëvizje nga ky pozicion.
“Përfaqësues të institucioneve në Prishtinë kanë intensifikuar fushatën e tyre propaganduese me të cilën synojnë ta rikonceptojnë Asociacionin e komunave serbe, duke u përpjekur me këmbëngulje ta reduktojnë në nivelin e një organizate joqeveritare, edhe pse është e qartë se Beogradi, në përpjekjet për të krijuar mekanizma solidë dhe të besueshëm për të mbrojtur pozicionin e vet dhe të drejtat e popullit serb në Kosovë, nuk do të devijojë as edhe një pikë nga Marrëveshja e parë e Brukselit dhe aktet e tjera nga dialogu që përcaktojnë qartë Asociacionin e komunave serbe” u shpreh Petkoviç.
Kujtojmë se respektimi i marrëveshjeve të kaluara, është në nenin 10 të propozimit franko-gjerman, që tashmë është pranuar nga të dyja palët.
Discussion about this post