NASA raportoi ditën e sotme se astronauti amerikan Mark Vande Hei do të kthehet këtë muaj nga Stacioni Ndërkombëtar Hapësinor me anijen ruse Soyuz, ashtu siç ishte parashikuar.
Saktësimi erdhi pas tensioneve gjeopolitike të javëve të fundit, me nisjen e pushtimit rus në Ukrainë. Gjithashtu, reagimi erdhi edhe pas një videomontazhi që tregonte astronautët rusë që braktisnin në hapësirë kolegun e tyre amerikan.
Përgjatë 10 viteve të fundit, anijet ruse kanë qenë i vetmi mjet për të dërguar astronautët në stacionin hapësinor dhe për t’i marrë nga atje.
“Operacionet e përbashkëta midis NASA-s dhe Roscosmos-it rus në Baikonur të Kazakistanit vazhdojnë më së miri. Ju siguroj që Mark Vande Hei do të kthehet në shtëpi”, u shpreh Joel Montalbano, menaxheri i programit të NASA-s në Stacionin Ndërkombëtar Hapësinor.
Edhe agjencia ruse e lajmeve “Tass” theksoi se astronauti amerikan do të kthehet me raketë ruse në datën 30 mars, ashtu siç ishte programuar muaj më parë.
Discussion about this post