Ministri i Drejtësisë, Ulsi Manja, i cili është njëherazi edhe drejtues politik i PS-së për Qarkun e Lezhës, ka reaguar për vrasjen e Ardian Nikulajt në Shëngjin dhe akuzat e opozitës.
Manja kërkoi nga organet ligjzbatuese që të zbardhet menjëherë kjo ngjarja, ndërsa lidhur me akuzat e opozitës ai tha se ndjen vetëm “neveri dhe përçmim”.
“E para dua të shpreh ngushëllimet e mia për familjarët e viktimës së djeshme në Lezhë dhe të shpreh gjithë solidaritetin tim në këtë ngjarje të trishtë që ka ndodhur dje në Lezhë. Në radhë të parë jemi shqiptarë, më pas jemi aleatë apo mund jemi dhe kundërshtarë politikë.
Por në rastin konkret duhet të bashkohemi në një kërkesë. Atë të zbardhjes menjëherë të kësaj ngjarje dhe të vënies së autorëve të këtij krimi të shëmtuar menjëherë përpara drejtësisë.
Tani lidhur me akuzat e djeshme, unë kam neveri dhe përçmim sepse janë të njëjtët njerëz që vëllavrasjen, nxitjen e përçarjes dhe përdorimin e viktimave për qëllime të përfitimit politik apo për qëllime personale e kanë pasur pjesë të ADN-së së tyre politike këtu e 32 vjet.
Ndjej vetëm neveri dhe përçmim, por është momenti të ftoj edhe njëherë organet ligjzbatuese që një orë e më përpara të zbardhin këtë ngjarje dhe autorët të shkojnë përpara drejtësisë”, u shpreh Manja.
Një ditë më parë, kreu i PD-së Sali Berisha e lidhi vrasjen e biznesmenit në Shëngjin me politikën, duke thënë se Nikulaj ishte kundër kandidaturës së Pjerin Ndreut për bashkinë e Lezhës.
Për këtë qëndrim, shkroi Berisha në “Facebook”, ai është kërcënuar vazhdimisht ditët e fundit nga Ulsi Manja dhe Pjerin Ndreu.
Discussion about this post