Hetimet për masakrën me tre të vrarë të Fushë Krujës vijojnë. Prokuroria ka kërkuar sot të marrë në pyetje 6 persona të cilët mund të kenë dijeni për atentatin mafioz i cili ndodhi mesditën e 17 korrikut.
Pritet të merren në pyetje Ramazan Rraja, nipi i deputetit të Partisë Socialiste Rrahman Rraja, Gentian Reci, Indrit Dokle, Fation Murati, Alesio Dobrozi dhe Rohan Brahimit, janë personat të cilët kërkohen që të merren në pyetje.
Tre ishin personat që u vranë me breshëri plumbash teksa po udhëtonin te mbikalimi në Fushë-Krujë, Brilant Martinaj, Dilen Vata dhe Arbër Hoxha.
Nga raportimet e gijotina.com dhe hetimet e deritanishme, dyshohet se 4 janë autorët që kanë marrë pjesë në atentatin mafioz. Ata kanë vëzhguar dhe më pas ndjekur viktimat teksa udhëtonin me makinë, dhe kanë hapur zjarr ndaj tyre, në një moment kur në këtë aks rrugor nuk kishte lëvizshmëri të automjeteve të tjera.
Sipas informacioneve autorët zbrazën rreth 80 plumba mbi makinën që ndodheshin viktimat.
Pasi kryen me sukses ekzekutimin e tyre, autorët janë larguar në drejtim të paditur ndërsa makina që dyshohet se është përdorur për të kryer krimin, u gjet e djegur pak kilometra larg vendit të ngjarjes, në fshatin Larushk.
Brenda makinës u gjetën 3 armë, ndërsa në vendin e ngjarjes u gjetën rreth 80 gëzhoja.
Atentati ka qenë i mirëorganizuar pasi policia nuk ka ende asnjë gjurmë të tyre, edhe pas këqyrjes paraprake të kamerave të sigurisë që ndodheshin përreth vendit ku u krye ekzekutimi i trefishtë.
Dinamika e ngjarjes dhe hetimet paraprake
Në atentat, nga raportimet e gijotina.com dyshohet se kanë marrë pjesë 4 persona. Tre prej tyre kanë qenë duke lëvizur me një makinë “Volkswagen Passat” kanë zbritur dhe kanë qëlluar me breshëri plumbash në drejtim të tyre.
Policia gjeti në fshatin Larushkë një makinë të djegur e cila dyshohet se i përket autorë. Brenda makinës u gjetën edhe 3 armë të cilat janë përdorur për të ekzekutuar Martinaj, Hoxhën dhe Vatën.
Makina e viktimave, sipas burimeve të grupit hetimor ka marrë flakë nga breshëria e plumbave.
Si pasojë Martinaj dhe Hoxha u shkrumbuan brenda mjetit, ndërsa Vata kishte tentuar të largohej, por autorët e kthyen dhe e qëlluan duke e lënë të vdekur jashtë makinës.
Policia dhe RENEA kanë blinduar Larushkën dhe Niklën për të bërë të mundur kapjen e autorëve.
E shkuara kriminale e viktimave dhe pistat paraprake të hetimit
Atentati i mirëorganizuar është kryer si pasojë e përplasjeve mes bandave kriminale dhe hakmarrjes. Kjo është pista kryesore e hetimit, deri tani. Kjo nisur edhe nga e shkuara kriminale e tre viktimave.
Brilant Martinaj, 23 vjeç, banues në Fushë-Kuqe ishte me precedent kriminal, i dyshuar për veprën penale “vrasja e kryer në bashkëpunim” dhe “armëmbajtje pa leje.”
Kujtojmë që Brilant Martinaj është kushëriri i Ervis Martinajt. Ai dyshohet se ka qenë autor i vrasjes së efektivit të FNSH, Xhuliano Prela ngjarje e ndodhur në 2020.
Martinaj ka qenë edhe mik i ngushtë me reperin e njohur, Stresi. Gjithçka konfirmohet nga një video, ku djemtë shfaqen në një berberhane, shumë të qeshur së bashku.
Diklen Vata, 30 vjeç njihej si person me precedent penal, kishte lidhje të afërt shoqërore me Brilant Martinaj dhe pjesëtar i grupit kriminal të Ervis Martinajt.
Arbër Hoxha, 34 vjeç, nga Fushë-Kuqe kishte lidhje të afërta shoqërore me Brilant Martinaj. Ky i fundit dyshohet si autor i ekzekutimi të efektivit të FNSH-së Xhuliano Prela në dhjetor 2020 dhe ish-policit Xhelal Reçi më 1 nëntor 2021.
Asnjë nga krimet nuk është provuar. Ndërsa Diklen Vata është kapur në shtator të 2017-ës me kokainë në Tiranë. A.L/ gijotina.com
Discussion about this post