Ekzekutimi i 25-vjeçarit Xhuljano Bullari ka tronditur jo vetëm familjen, por edhe shokët dhe miqtë e tij.
“Qofsh i xhenetit shoku im” shkruan Serafin Frroku në një postim në Facebook. Bullari me origjinë nga Elbasani, por që jetonte në Tiranë u gjet i ekzekutuar në Babicë të Vlorës. Autorët e atentatit mafioz ende nuk janë zbuluar, ndërsa pistat ku po heton policia dhe prokuroria janë disa.
Babai i viktimës është shprehur për grupin hetimor se nuk ishin në dijeni se djali kishte konflikte.
“Djali është larguar nga shtëpia në Babrru të Tiranës rreth orës 18.00- 19.00 pasdite si zakonisht për të pirë kafe. Nuk dinim të kishte konflikte, priste të ikte në Gjermani te vëllai, pasi donte të largohej nga Shqipëria.
Më herët ka bërë 2.5 vite burg për dhënie ndihme në kalim të paligjshëm të kufirit. Pasi ishte arrestuar në Fier. Nuk kishte asgjë që ta lidhte me Vlorën” ka thënë para grupit hetimor.
Identifikimi i viktimës është bërë nga nëna e tij, në morgun e qytetit të Vlorës. Sipas të njëjtave burime nga grupi hetimor, “25-vjeçari nuk e ka pritur goditjen, gjykuar nga pozicioni”.
Kjo ngre dyshime se ai ka arritur aty, pra në Babicë të Vlorës i shoqëruar me persona të cilët i njihte, që më pas e prenë në besë.
