Vijojnë hetimet për atentatin ndaj Orlando Paplekajt, djalit të policit të burgjeve tre ditë më parë. Deri në këtë fazë policia ka arritur të mbledh një sërë kamerash sigurisë të bizneseve por edhe banesave në të cilën ka filluar edhe këqyrja e tyre për të mësuar më shumë mbi lëvizjet e autorit.
Bëhet me dije se automjeti që dyshohet se u përdor nga autorët e ngjarjes pas kryerjes së sulmit është pikasur në rrugën e Maminasit, në të cilën më pas ka marrë drejtimin për në zonën e Fushë-Krujës.
Ky itinerar lëvizje nga makina “Golf 5” e cila rezulton më targa të vjedhura, ka shtyrë edhe më shumë dyshimet se autorët e sulmit i përkisnin zonën së Fushë-Krujës. Për këtë arsye një sërë kontrollesh janë kryer në atë territor dhe kryesisht kanë qenë pikat e servisit ku dyshohet se makina mund të jetë çmontuar pasi deri më tani nuk është raportuar për makinë të djegur apo të braktisur.
Nga analizimi i provave dhe i fakteve në vendin e ngjarjes bëhet me dije se autorët që mendohet të jenë 2 nuk kanë qëlluar në drejtim të Paplekajt apo drejt mjetit të tij, por në ajër. Ky veprim nga policia po cilësohet si paralajmërim.
Orlando Paplekaj ishte kunati i Besmir dhe Viktor Haxhiaj të ekzekutuar në prill të vitit 2020. Orlando Paplekaj dyshohet se ka dijeni për ngjarjet për shkak të lidhjeve, por provat për ta mbështetur këtë pistë mësohet se janë të pakta.
Discussion about this post