Lëvizja Socialiste për Integrim ka komentuar situatën e rëndë me rendin dhe sigurinë publike në vend, pas vrasjes së biznesmenit Demir Backa në Fier dhe dhunimit të sipërmarrësit Nazmi Çangu në Nikël.
Sekretari i përgjithshëm i LSI, Endrit Bramllari në një deklaratë për mediat, fajësoi kryeministrin Rama se ka përfshirë persona të botës së krimit në Policinë e Shtetit, duke ia bërë kësaj të fundit të pamundur kryerjen e detyrës.
“Rritja e indeksit të kriminalitetit është një fakt që tregon qartë se Policia e Shtetit ka humbur kontrollin mbi territorin. Inkriminimi i një pjese të Policisë së Shtetit ka zbehur tërësisht rolin e kësaj strukture. Kapja politike e Policisë së Shtetit nga Edi Rama në këto tetë vite ka siguruar paprekshmërinë e trafikantëve dhe përdorimin e tyre në funksion të blerjes së votave dhe fakti më konkret ishin zgjedhjet e 25 prillit. Kjo situatë e rëndë ka vendosur në pozitë të vështirë pjesën e ndershme të trupës së policisë, e cila ndihet e tradhtuar nga një qeveri e bërë njësh me krimin e organizuar”, shprehet Braimllari.
Sipas Braimllarit, sa kohë që Rama do të jetë kryeministër për strukturën e policisë nuk do të ketë zgjidhje që ajo të kryejë funksionin e saj për ruajtjen e rendit dhe parandalimin e ngjarjeve kriminale të cilat po cënojnë sigurinë publike.
