Në Gjykatën e Posaçme u paraqiten dy të mitur për të dëshmuar në procesin ndaj Redjan Rrajës dhe Arjol Halilaj, në lidhje me atentatin ndaj prokurorit Arjan Ndoja. Mësohet se, dy vëllezërit e mitur shoqëroheshin nga babai i tyre dhe një psikolog. Ata kanë parë autorët e dyshuar të atentatit, gjatë momentit kur kanë braktisur makinën në Shkafanë.
Të miturit nuk dëshmuan pasi seanca u shty për shkak se munguan avokatët e Redjan Rrajës. Ky i fundit ndërkohë konfirmonte nga regjimi 41 biss se nuk mund të merrte pjesë në seancë për arsye shëndetësore.
Kujtojmë se, Arjan Ndojës iu bë atentat te mbikalimi i Shkozetit në Durrës. Prokurori ishte në automjet me një person me precedentë penalë, të njohur si i “forti i Sukthit”, Landi Muharremi nga Sukthi, dhe me Andi Malokun, ish-punonjës i policisë në komisariatin e Krujës, në atë kohë shofer i prokurorit.
Drejt makinës së tyre u qëllua me breshëri plumbash, ku Ndoja dhe Muharremi mbetën të plagosur, ndërsa Maloku ndërroi jetë.
Discussion about this post