Janë identifikuar dy personat që ishin shënjestër e atentatit në Elbasan, e bëhet fjalë për Lulzim Bitrin e Ardjan Collakun (ky i fundit në vdekje klinike).
Ardjan Collaku (Subashi) është arrestuar nga policia e Elbasanit në vitin 2015, gjithashtu është një person i shpallur në kërkim ndërkombëtar me qëllim ekstradimin, i dënuar në Itali me 23 vjet burg.
Lulzim Bitri gjithashtu është një person me precedencë të mëparshme penale, i arrestuar në vitin 2020.
Dyshohet se autorët e kësaj ngjarje të jenë larguar me një mjet tip Benz Mercedes, i cili më pas u gjet i djegur në Balldren. Sipas burimeve kemi të bëjmë me një atentat të mirëmenduar e dyshohet se autorët kanë survejuar shënjestrën e tyre prej kohësh, madje duke mësuar dhe intenerarin e tij.
Lulzim Bitri dhe Ardjan Collaku kanë qenë duke lëvizur në këmbë, teksa dyshohet se autorët u kanë bërë pritë e më pas kanë shtënë drejt tyre.
Por kush janë Ardian Subashi (Çollaku) dhe Lulzim Bitri?
Ardian Subashi (Çollaku) në 26 maj të vitit 2015 u arrestua nga efektivët e policisë, në qendër të qytetit të Elbasanit.
Një ditë para arrestimit ai ishte shpallur në kërkim ndërkombëtar nga Interpol Tirana, pasi Gjykata e Modenas, e kishte dënuar me 23 vjet e 3 muaj e 17 ditë burgim për veprat penale të “Shfrytëzimit të prostitucionit” dhe “Prodhimit dhe mbajtjes pa leje e armëve luftarake dhe e municionit” parashikuar nga nenet 110 dhe 600 të Kodit Penal Italian. Ndërkohë Subashi ka qenë edhe subjekt i OFL ku vitin e kaluar së bashku me 3 persona të tjerë u është kërkuar deklarimi i pasurisë.
Nga ana tjetër viktima tjetër, Lulzim Bitri ka qenë i dënuar me 4 muaj burg nga shteti maqedonas pasi ishte i përfshirë në një përplasje me armë në Tetovë në vitin 2018 ku një person mbeti i vrarë.
Lulzim Bitri, pas vuajtjes së dënimit iu ndalua hyrja prej 5 viteve në Maqedoni.
