Qyteti i Fierit u përfshi ditën e së shtunës nga një ngjarje e rëndë, ku rreth orës 20:40, në vendin e quajtur “Rrethrrotullim i QTU-së”, u dëgjuan disa të shtëna armësh dhe si pasojë ka mbetur viktimë Demir Backa, rreth 50 vjeç, pronar i një lokali në qendër të Fierit.
Viktima dyshohet të ketë qenë në automjetin e tij tip “Audi”, ku një makinë tjetër tip “Benz” ka qëlluar me kallashnikov 50-vjeçarin, i cili si fillim u dërgua në spitalin e Fierit në gjendje shumë kritike për jetën.
Mesa duket, plagët e marra ishin tepër të rënda dhe për këtë arsye Demir Backa nuk i mbijetoi dot këtij sulmi, për të cilën ende nuk dihen motivet e sakta.
Deri më tani, e vetmja shenjë që besohet të jetë nga autorët e ngjarjes është e një makine të djegur tip “Benz”, i cili u zbulua në fshatin Daullas, pranë spitalit Memorial të Fierit.
Grupi hetimor nën drejtimin e Prokurorisë ndodhet në vendngjarje dhe po punon për identifikimin dhe kapjen e autorëve. Ndërkohë janë ngritur disa pika kontrolli në hyrje dhe dalje të qytetit të Fierit.
Damir Backa është vëllai i ish-anëtarit të bandës së Fierit, “Pusi i Mezinit”, i cili u vra në 1997-ën. Vëllai i tij, Medi Backa, i njohur ndryshe edhe si Buc Backa, u vra në masakrën e Levanit, së bashku me 23 persona të tjerë.
Ngjarja e rëndë ndodhi më 28 mars 1997, dhe është përplasja më e përgjakshme e trazirave të vitit 1997. Në këtë përplasje të dhunshme mbetën të vrarë 24 persona. Përplasja u zhvillua midis Bandës së Pusit të Mezinit dhe banorëve romë të fshatit Levan në Fier. E gjithë banda u eleminua gjatë kësaj përplasjeje.
Banda e Pusit të Mezinit ishte një grup kriminal me aktivitet në gjithë Shqipërinë e Jugut. Origjina e anëtarëve të kësaj bande ishte nga i gjithë jugu i vendit.
Shumica e tyre kishin qenë të burgosur edhe gjatë regjimit komunist për krime dhe kishin vendosur të quheshin “Të fortët e Jugut”. Kjo bandë kishte si rivale kryesore Bandën e Çoles të drejtuar nga Zani Çaushi. Banda e Pusit të Mezinit ishte mbështetëse e flaktë e Partisë Demokratike, dhe me sa duket kjo shkaktoi edhe eliminimin e tyre.
