Detaje të reja kanë dalë në dritë nga atentati i ndodhur dy ditë më parë në qendër të Fierit, ku mbeti i vrarë biznesmeni Demir Backa. Burime për Gijotina.com kanë bërë të mundur zbardhjen e skemës së atentatit, teksa shprehen se makina e viktimës tip “Audi”, ka qenë duke dalë nga parkimi kur është qëlluar me breshëri kallashnikovi nga një mjet tjetër në lëvizje tip “Benz”.
Mësohet se, vetëm 2 kanë shtënë mbi 57-vjeçarin, ndërkohë që bashkëpunëtori i tyre i priste në fshatin Daullas për t’u larguar nga Fieri. Aty kanë braktisur mjetin e tyre tip “Benz”, targat e të cilit ishin si ato të Kosovës, por nuk figuronin të regjistruara as në Shqipëri. Edhe armët që u gjetën brenda makinës, kishin numër serial të fshirë duke e vështirësuar punën e hetuesve. Policia dyshon se presonat janë vrasës me pagesë nga zona e Krujës ose Laçit.
Mësohet se, pista kryesore e hetimit, ajo se Demiri ishte vëllai i ish-anëtarit të bandës së Fierit i cili është vrarë në 1997-ën, Medi Backa, ose i njohur ndryshe si Buc Backa, ka rënë, pasi ai ishte kushëriri i tij dhe jo vëllai. Gjithashtu, policia ka hedhur poshtë dhe pistën për vrasjen e së motrës, pasi ka qenë aksidentale.
Ngjarja e rëndë ndodhi mbrëmjen e së shtunës, në vendin e quajtur “Rrethrrotullimi i QTU-së”, në Fier. Backa u qëllua 18 herë më armë. Tre plumba e kanë kapur në pjesën e qafës dhe kokës edhe 15 të tjerë në kraharor. 57-vjeçari mbeti i plagosur nga atentati dhe u dërgua në spitalin e Fierit, por nuk ka mundur t’i mbijetojë plagëve të marra dhe ka ndërruar jetë.
Për ngjarjen, policia e Fierit, Forcat e Posaçme “Shqiponja” dhe 2 grupe të FNSH bënë të mundur krehjen e zonës, ndërsa po punojnë për identifikimin dhe arrestimin e autorëve.
