Në vitin 2016, numri i personave të dënuar, ose në paraburgim në burgun e Peqinit në vitin 2019 u përgjysmua në krahasim me numrin e tyre, megjithatë buxheti i këtij institucioni u rrit me thuajse 22 për qind, duke u bërë rast “studimor” në një raport të Kontrollit të Lartë të Shtetit.
Sipas raportit të KLSH-së, vërehet se nga të dhënat e siguruara nga Drejtoria e Përgjithshme e Burgjeve, në 2016 në burgun e Peqinit kishte 667 persona të dënuar dhe 38 të paraburgosur, pra në total 705 persona. Buxheti për administratën e burgut ishte 315 milionë lek. Kapaciteti total i këtij institucioni ishte 558 persona.
Ndërsa në vitin 2019, numri i të dënuarve ra në 305 dhe të paraburgosur ishin 142 persona, ku në total shkonin në 447 persona. Por, pavarësisht uljes me 258 të numrit të personave që ka trajtuar në 2019 në krahasim me 2016-n, buxheti i shpenzuar nga burgu i Peqinit u rrit nga 315 milionë lek në 385 milionë lekë. Vetë KLSH është shprehur se do ta hetojë këtë “anomali” me buxhetet.
“Identifikohet qartësisht se buxheti në dispozicion të këtij burgu për të realizuar detyrat funksionale të tij ndjek një trend rritës përgjatë periudhës së auditimit, nga 315 milion lek në 2016 në 383.5 milion lek në 2019, që do të thotë se rritja është rreth 21.7 për qind. Me këto të dhëna peshën kryesore të buxhetit e zë buxheti i financuar nga shteti. Pra, pritet që burgu i Peqinit të ketë ofruar efektivitet në rritje të përmbushjes së objektivave institucional si dhe efektivitete ndaj kategorisë shoqërore të cilës i ofron shërbimin penitenciar” – thuhet në raport.
Në auditin e KLSH, në këtë periudhë kohore janë edhe burgjet e Rrogozhinës, Korçës dhe Vlorës. Në raport thuhet se numri i të burgosurve përtej kapaciteteve të tyre mbetet një problematikë.
