Presidenti i Austrisë ka nënshkruar ditën e sotme një ligj që e bën vaksinimin kundër Covid-19, të detyrueshëm për të gjithë të rriturit.
Ky ligj është i vetmi i këtij lloji në Bashkimin Evropian.
Ligji vlen për të gjithë të rriturit, përveç grave shtatzëna dhe personave që përjashtohen nga vaksinimi për arsye mjekësore.
Ata që refuzojnë vaksinimin dhe nuk e marrin dozën mund të dënohen me një gjobë prej 3,600 eurosh pas mesit të marsit.
Presidenti Alexander Van der Bellen nëshkroi ligjin pasi Parlamenti e miratoi atë.
Ky ligji u publikua në gazetën zyrtare dhe hyn në fuqi zyrtarisht ditën e nesërme.
Nga ana tjetër, dhjetëra mijëra persona kanë protestuar kundër vaksinimit të detyrueshëm në protesta të rregullta gjatë fundjavave në gjithë vendin, që kur kjo masë u paralajmërua në nëntor të vitit 2021.
Por ligji ka një mbështetje të gjerë politike me të gjitha partitë, përveç të djathtës ekstreme në një përpjekje për të rritur shkallën e vaksinimit të vendit.
Aktualisht, 69 përqind e banorëve austriakë kanë certifikata se janë plotësisht të vaksinuar kundër koronavirusit duke përfshirë edhe dozat përforcuese.
Austria ka parë deri më sot më shumë se 14,000 vdekje të lidhura me Covid-19 dhe afër 2 milionë raste në një popullsi prej nëntë milionësh.
Vaksinimet e detyrueshme kundër koronavirusit janë të rralla edhe pse Ekuadori, Taxhikistani, Turkmenistani, Indonezia dhe Mikronezia kanë prezantuar skema të tilla.
Discussion about this post