Autoritetet e Vlorës: Dyshohet se është i qëllimshëm zjarri që dogji varrezat në Hoshtimë

Një zjarr i madh është ndezur në fshatin Hoshtimë të Vlorës, i cili ka djegur varrezat aty pranë. Flakët janë shtrirë deri fare pranë disa shtëpive në zonë, duke rrezikuar seriozisht banorët dhe pronat e tyre, ndërsa është përhapur edhe në ullishte. I favorizuar nga temperaturat e larta dhe erërat e forta, zjarri ka përparuar në drejtim të fshatrave Kërkovë dhe Bestrovë

Policia ka larguar të gjithë qytetarët që jetojnë në banesat e rrezikuara nga flakët në Hoshtimë. Po ashtu, fshatarët kanë zhvendosur bagëtitë nga stallat.

Në vendngjarje kanë mbërritur deri tani të paktën 9 mjete zjarrfikëse (4 nga Vlora, 1 nga Fieri, 1 nga Himara, 1 nga Berati, 1 nga Elbasani, 1 nga Pshalimani) helikopteri i Forcave të Armatosura, i cili po hedh ujë nga lart mbi flakët, si dhe Forcat e Ndërhyrjes së Shpejtë.

Robert Skëndaj nga emergjencat civile, Prefektura Vlorë, thotë se zjarri në fshatin Hoshtimë është vënë nën kontroll.

“Zjarri është normalizuar falë ndërhyrjes nga ajri dhe forcave nga bashkitë fqinje, të cilat kanë ardhur në ndihmë.Dyshimet e para hidhen për një zjarr të ndezur në varreza, bërë shkak për t’u përhapur në gjithë fshatin Oshtimë e më pas, i favorizuar nga era e fortë, drejt Kerkovës”,- tha Skëndaj.

“90% e zjarreve janë të qëllimshme”. Kështu ka deklaruar prefekti i qarkut të Vlorës, Plator Nesturi.

Nesturi u shpreh se ka qenë një reagim i menjëhershëm nga të gjitha strukturat, edhe nga bashkitë e tjera të cilat kanë dhënë ndihmën e tyre, pasi zjarri rrezikoi banesa në Hoshtimë, Kerkovë dhe Bestrovë.

Prefekti ka kërkuar një reagim më të ashpër ndaj piromanëve që vendosin zjarre dhe shkaktojnë situata të tilla.

Kryebashkiaku i Vlorës, Ermal Dredha, thotë se ekzistojnë dyshime se zjarri që ka përfshirë një sipërfaqe jo të vogël në fshatin Hoshtimë, të ketë nisur nga varrezat e kësaj zone.

“Të gjitha strukturat në terren për menaxhimin e situatës. Zjarri dyshohet se ka ardhur nga varrezat e Hoshtimës. Po punohet nga forcat zjarrfikëse, Policia dhe forcat e armatosura dhe nga ajri. Patjetër që do të ketë hetim për zjarrin nga strukturat, ndërsa nëse mund të themi i qëllimshëm apo gabim njerëzor, këtë do ta përcaktojnë hetimet”,- tha Dredha.