Nënkryetarja e PD, Jorida Tabaku ka akuzuar qeverinë se po shpik agjenci të reja për interesa klienteliste dhe korruptive, pas vendimit të kësaj të fundit për krijimin e një agjencie për Manaxhimin e Fondeve të Donatorëve.
“Mania për të kontrolluar gjithçka dhe gjithkënd nuk ndalet. Ka vite qe ne Ministrinë e Financave nën modelet më të mira është ngritur një drejtori specifike për menaxhimin e fondeve që vijnë nga BE. Ky model specifik dhe i mirë trajnuar po shkatërrohet nga njeriu i vetëm që zhduku kufijtë ndarës së partisë me shtetin. Mbrëmë është publikuar një VKM e qeverisë për një agjensi të re për Manaxhimin e Fondeve të Donatorëve, mbas asaj të Medias dhe Platformës digjitale. Sot Rama ka ideuar dhe ndërtuar shtetin më të madh dhe me një centralizim pushteti të pa ekzistuar më parë”, shkruan Tabaku.
Përmes një postimi në Facebook, Tabaku shprehet se ky vendim është një goditje ndaj demokracisë, ndërsa e konsideron si një “hambar” punësimesh partiake.
“Sajesat e tij që mbajnë emrin e Agjencive dhe Ministrive pa portofol janë një goditje ndaj demokracisë dhe decentralizimit. Agjencia në fjalë njësoj si 2 agjencitë e tjera është thjesht një kod për të fshehur punën reale që ato do bëjnë. Pra, Agjencia do të ndërtojë politika, do menaxhojë fonde, do te jete një Ministri e re e Financave. Kjo sajesë, njësoj si Agjencia e Mediave dhe ajo e Bashkëqeverisjes, do të jenë hambari i punësimeve politike dhe partiake që do të zhvlerësojnë dhe shumëzojnë me zero infrastrukturën dhe paratë e shpenzuara për punësimin e administratës civile”, shprehet ajo.
Sipas deputetes së PD, kjo i jep mundësi kryeministrit Rama të distancojë qytetarët dhe përfituesit nga fondet, dhe të vendosë aty ata që të abuzojnë me paratë e BE-së dhe donatoreve te tjerë.
