Zbardhen detaje nga vrasja e dyfishtë e ndodhur në zonën e Dukagjinit në Qarkun e Shkodrës, ku viktima mbetën babë e bir, Gjokë dhe Eduart Gurra,
Viktimat kishin shkuar në fshatin Sumë, Njësia Administrative Pult, atje ku kishin një banesë që iu ishte djegur një ditë më parë.
Në rrethana të paqarta ato janë qëlluar me breshëri nga autorë ende të paidentifikuar. Dyshimet e para janë se vrasja e dyfishtë mund të ketë lidhje me kultivimin e drogës, pasi Njësia Administrative Pult konsiderohet si një nga zonat e nxehta në kultivimin e narkotikëve.
Gjithsesi kjo mbetet një pistë paraprake, pasi në njoftimin zyrtar policia thotë se vrasja ka ndodhur në rrethana të paqarta.
Ndërkohë mësohet se 57-vjeçari Gjokë Gurra për vite me rradhë ka shërbyer si punonjës policie në Drejtorinë e Shkodrës.
Gurra ka qënë polic i objekteve, dhe si 57 vjeçari ashtu edhe djali i tij, 31 vjeçar, Eduart Gurra, nuk kanë rekorde kriminale apo histori gjakmarrjeje.
Nga të dhënat e fundit mësohet se një person është shpallur në kërkim si i dyshuar për krimin e dyfishtë.
“Rreth orës 16:40, në fshatin Sumë, Njësia Administrative Pult, në rrethana ende të paqarta janë vrarë me armë zjarri shtetasit Gj. G., 57 vjeç dhe djali i tij, E. G., 31 vjeç, banues në lagjen “Partizani”, Shkodër.
Shërbimet e Policisë dhe Grupi hetimor janë nisur menjëherë për në vendngjarje.
Me mbërritjen e shërbimeve dhe sqarimin e rrethanave të ngjarjes do të japim përsëri njoftim më të detajuar”, njoftoi policia në një njoftim paraprak mbi ngjarjen.
Discussion about this post