Detaje të reja janë zbardhur lidhur me ngjarjen e rëndë të ndodhur pasditen e së enjtes ku babë e bir, Gjokë dhe Eduart Gurra, u ekzekutuan me breshëri automatike në fshatin Sumë, Njësia Administrative Pult, zona e Dukagjinit.
Nga të dhënat e mbledhura nga grupi hetimor dyshohet se në krimin e dyfishtë kanë marrë pjesë të paktën dy persona, njëri në rolin e ekzekutorit dhe tjetri në atë të vëzhguesit. Dyshohet se babë e bir, që kishin shkuar në fshatin Sumë, atje ku kishin një banesë, të cilën ua kishin djegur një natë para vrasjes, janë ndjekur nga një person, i cili më pas ka njoftuar ekzekutorin.
Babë e bir janë qëlluar me breshëri, nga një armë e vetme, ndërsa në vendin e ngjarjes janë gjetur 8 gëzhoja. Viktimat janë gjetur në automjetin e tyre, të pajetë, nga banorë të zonës që më pas kanë njoftuar mbi krimin e dyfishtë.
Krimi mendohet se ka qenë i mirëorganizuar, madje edhe djegia e banesës dyshohet se ka ndodhur për të futur në kurth viktimat.
Policia njoftoi një ditë më parë se ka shpallur në kërkim një person të dyshuar, ndërkohë që pista e gjakmarrjes përjashtohet pasi si Gjoka ashtu edhe djali i tij Eduarti nuk kanë pasur konflikte
Gjokë Gurra vite më parë ishte pjesë e strukturave të Policisë së Shkodrës, ndërsa prej të paktën 10 vitesh, bashkë me djalin e tij Eduartin, kishin një licensë lidhur me shitjen e lëndës drusore.
Zyrtarisht policia është treguar e rezervuar lidhur me pistat ku po hetohet për krimin e dyfishtë, ndërsa janë ngritur dyshime se ai mund të jetë kryer nga persona të përfshirë në kultivimin e narkotikëve. Gjithashtu po hetohet edhe pista e lidhur me biznesin që ushtronin babë e bir.
Discussion about this post