Nuk mjaftohet vetëm me postin e ministrit të Brendshëm, Taulant Balla ka nisur të bëjë rolin edhe të shefit të trafikut. Pasi ka hartuar plane e strategji për të luftuar krimin dhe drogën, pasi ka shtuar sigurinë në çdo qytet e rrugë të vendit, ministri po kujdeset tashmë për të çliruar edhe trafikun.
Mos prisni që të shikoni ministrin e Brendshëm në ndonjë kryqëzim si punonjës të Policisë Rrugore, thjesht ai ka shpalosur vizionin e tij si reformator i qeverisë, veçanërisht në fushën e rendit dhe sigurisë.
Nga momenti që u vendos në postin ministror, të cilin e ëndërronte nga dita që Edi Rama mori detyrën e Kryeministrit në vitin 2013, Taulant Balla ka shtuar dozat e aktivitetit në rrjetet sociale.
Pas çdo aksioni policor, përfshi edhe ato rutinor me arrestime apo ndalime mëse të zakonshme, do të gjeni një reagim të Taulant Ballës në rrjetet sociale.
Së fundmi, Balla është kujtuar të flasë edhe për parkimet e gabuara.
Madje, ministri i Brendshëm, sigurisht edhe me drejtuesit e lartë të Policisë së Shtetit, ka hartuar një plan masash për të lehtësuar trafikun e rënduar jo vetëm në Tiranë, por edhe qytete të tjera të mëdha.
Për këtë Balla bën të ditur se shumë shpejt do të ndërhyhet me karoatrec për të zhvendosur makinat e parkuara gabim.
Nuk dihet nëse ministri i Brendshëm ka ndonjë plan për të krijuar një kompani shtetërore që do të ketë në administrim karrotrecët që do të “rrëmbejnë” makinat e parkuara gabim, apo do të kontraktohet ndonjë nga kompanitë private që ofrojnë këtë shërbim.
“Ne duam mirëkuptimin e drejtueseve dhe drejtuesve të mjeteve, se makina juaj e parkuar gabim është një problem shumë i madh për të tjerët, të cilëve u ke zënë rrugën, po ashtu dhe një karshillëk i madh ndaj Kodit Rrugor.
Numri i madh i masave ditën e djeshme në Tiranë, është një apel publik për reflektim dhe bashkëpunim drejtuar përdoruesve të mjeteve. Policia e Shtetit nuk do ta tolerojë asnjë çast këtë shkelje masive dhe këtë karshillëk.
Brenda pak ditësh çdo mjet i parkuar gabim do të largohet nga vendqëndrimi i gabuar me makineri të specializuar të kontraktuar nga Policia Rrugore dhe do të bllokohet.
Parkimeve të gabuara vend e pa vend, parkimeve dyshe, treshe mu në mes të rrugës, parkimeve mbi trotuar apo tek korsia e biçikletave etj., do duhet t’i jepet fund.
Trafiku i rënduar në kryeqytet dhe në qytetet e tjera ka si burim kryesor edhe parkimet e gabuara, të cilat bllokojnë rrjedhshmërinë e trafikut”, bën të ditur ministri.
Discussion about this post