Kreu i grupit parlamentar të PS, Taulant Balla e ka konsideruar si të drejtë vendimin e Gjykatës Kushtetuese për rrëzimin e padisë së Shoqatës së Bashkive për vlefshmërinë e zgjedhjeve të 30 qershorit 2019.
Nga kryesia e Kuvendit, Balla tha se vendimi i gjykatës ishte i duhuri, ndërsa shtoi se tani presidenti Meta duhet të vendosë sipas Kushtetutës, duke nënkuptuar caktimin e datës së zgjedhjeve të parakohshme në gjashtë bashki.
“Gjej rastin të shpreh vlerësimin për institucionet e ngarkuara nga Kushtetuta për organizimin e proceseve zgjedhore. Kuvendi u shpreh për rivendosjen e respektimit të Kushtetutës. Vendimi i Gjykatës ishte i duhuri. Është sovrani që vendos, asnjë palë nuk mund të pengojë në zgjedhjet. Shpreh vlerësimin për konsulencën dhe dobinë që marrim nga Venecia. Sa herë që japin një opinion, duhet pranuar nga të gjitha palët. Presidenti duhet të marrë vendimmarrje në atë që përcakton Kushtetuta në këtë rast”, tha Balla.
Edhe pak ditë më parë, Partia Socialiste përmes sekretarit të përgjithshëm Damian Gjiknuri u shpreh e gatshme për zgjedhjet e parakohshme lokale në gjashtë bashkitë.
Discussion about this post