Kreu i grupit parlamentar të PS, Taulant Balla është munduar të justifikojë gabimin e kolegut të tij Bujar Çela pas foto ku uronte Ditën e Pavarësisë me foton e diktatorit Enver Hoxha, por ky i fundit e nxori blof.
Pas nderimeve që i bëri në varrezat e Fierit dëshmorëve të Luftës Nacional Çlirimtare, Balla tha për mediat se ka marrë një sqarim nga deputeti Çela se telefonin e tij e ka përdorur dikush tjetër, ndërsa tha se do të bëhen të gjitha verifikimet e nevojshme për të vendosur nëse do të merret masë disiplinore ndaj tij.
“Unë kam marrë një sqarim nga deputeti në fjalë, që bëhet fjalë për përdorim të aparatit të tij celular nga persona të tjerë. Kjo do të jetë pjesë e një verifikimi në aspektin e kodit të sjelljes dhe etikës brenda grupit parlamentar dhe çdo masë ndëshkimore do të merret në momentin që do të ketë verifikime. Do i kërkoja të gjithë kolegëve të tjerë të raportojnë raste të tilla dhe natyrshëm që grupi parlamentar i PS ka të gjithë instrumentet e nevojshme për të ndërmarrë çdo lloj hapi apo mase disiplinore”, tha Balla.
Por këtë deklaratë e ka hedhur poshtër Çela, i cili nënkuptoi se i qëndron mendimit të tij, kur tha para mediave se Enver Hoxha nuk është nul, dhe e konsideroi si udhëheqës të luftës nacional-çlirimtare.
Discussion about this post