Balla: Shqiptarët po bëjnë trafikun e drogës nga Amerika Latine në Europë

Ministri i Brendshëm, Taulant Balla, ka pohuar se shtetas shqiptarë janë të përfshirë në trafikun e drogës nga Amerika Latine në Europë.

Këtë deklaratë, Balla e ka bërë gjatë takimit me homologun e tij spanjoll Fernando Grande-Marlaska.

Në takim u fol për intensifikimin e bashkëpunimit në goditjen e rrjeteve kriminale të përfshira në trafikun e narkotikëve nga disa vende të Amerikës latine drejt Europës.

“Me Ministrin e Brendshëm të Spanjës Fernando Grande-Marlaska, biseduam mbi bashkëpunimin midis agjencive tona ligjzbatuese në luftën kundër trafikimit të narkotikëve dhe krimit të organizuar.

Do të intensifikojmë bashkëpunimin në goditjen e rrjeteve kriminale të përfshira në trafikun e narkotikëve nga disa vende të Amerikës latine drejt Europës, ku janë të përfshirë edhe shtetas shqiptarë”, shkruan Balla në një postim në rrjetet sociale.

Takimi mes Ballës dhe homologut spanjoll vjen një ditë pasi në Dubai u arrestua Amant Josifi, ish-këshilltar i Olta Xhaçkës gjatë kohës që drejtonte Ministrinë e Mbrojtjes. Josifi ishte shpallur në kërkim ndërkombëtar nga autoritetet spanjolle, por nuk u arrestua nga organet ligjzbatuese shqiptare, duke ngritur dyshime të forta edhe për largimin e tij nga Shqipëria.