Ish-deputeti i Partisë Demokratike Klevis Balliu ka qenë sërish në gjykatë ditën e sotme, pasi në gjyqin e zhvilluar ndaj tij ka dëshmuar një tjetër person.
Balliu deklaroi se në dy vite ka qenë efektivi i policisë Klevis Karafilaj, i cili kishte deklaruar se ish-deputeti i ka nxjerrë krahun gjatë protestave në zonën e Unazës së Re, ndërsa sot dëshmoi dikush tjetër.
“Në dy vite keni dëgjuar që një efektiv policie Klevis Karafilaj që kishte deklaruar se unë i kisha nxjerrë krahun. Sot doli dikush tjetër që më akuzon. Arsyeja e vetme përse unë dola është sepse revolta e qytetarëve solli thyerjen e xhamit. Që ato të mos godisnin efektivë të policisë së Shtetit unë nxora trupin. Në asnjë moment nuk kam refuzuar të futem në fugonin e policisë. Sot pati një dëshmi të këtij zotërisë, që sipas tij i kam nxjerrë krahun pa dashje”, ka thënë ai.
Balliu u shpreh para mediave se qytetarët që janë kundër qeverisë përplasen dyerve të gjykatave, ndërsa shtoi se i këtij mendimi ka qenë edhe kreu i PD, Lulzim Basha, por që tashmë sipas tij ka ndërruar mendim.
“Ata që luftojnë kundër regjimit, përplasen gjykatave të kapura. Deri dje edhe Basha kështu mendonte, por tani ka ndryshuar mendje”, deklaroi ai.
Balliu dhe katër banorë të Unazës së Re akuzohen për protesta të paligjshme, kundërshtim të policisë dhe pengim të funksionarëve publikë në ushtrim të detyrës.
Discussion about this post