Ballkani shkroi historinë, duke u bërë klubi i parë i Kosovës që shkon në fazën e grupeve të kompeticioneve europiane.Pasi ia doli të fitojë titullin e parë kampion në histori sezonin e kaluar, erdhi më pas një tjetër arritje e madhe, faza e grupeve në Conference League.
Në fillim u mendua se ekipi nga Suhareka do të ishte kalimtare në këtë kompeticion, por ndodhi e kundërta. Ekipi drejtuar nga Ilir Daja, ia bënte ndeshjen të vështirë cdo kundërshtari, që ndoshta me pak eksperiencë e dinakëri, mund të kishte marrë më shumë nga kjo aventurë e parë. Gjithsesi katër pikë në gjashtë përballje është një tregues i mirë për Ballkanin.
Nuk ka asnjë pendesë për këtë aventurë, sepse Ballkani është larguar nga Conference League me miliona euro. Një shifër prej 2,940,000 euro është përfituar që në momentin që klubi është kualifikuar në fazën e grupeve, ndërsa 666 mijë të tjera janë arkëtuar pas një fitoreje dhe një barazimi të arritur në këtë fazë.
Në total janë 3 milionë e 606 mijë euro të fituara nga Ballkani. Një shifër mjaft e lartë për një skuadër të vogël që me shumë gjasa, mund të kthehet në superfuqi në kampionatin vendas.
Discussion about this post