Ish-Ministri i Bujqësisë, Edmond Panariti, ka reaguar për projektin e “Ballkanit të Hapur”. Me anë të një statusi në Facebook, Panariti merr shembull prodhimet në vendin tonë, që sipas tij kanë një kosto 40% më të lartë se vendet e rajonit.
“Pra, me pak fjalë ti nis të vraposh me një gjyle të lidhur në këmbë në një garë ku të tjerët jo vetëm që i kanë këmbët e lira, por kanë marrë edhe nja dy doza “doping” për të shtuar shpejtësinë dhe për të arritur në finish atëherë kur ti je ende në mes të rrugës” – shkruan Panariti.
Panariti ka ironizuar me projektin duke thënë se është i humbur që pa nisur, pasi sipas tij Shqipëria nuk e fiton garën në këtë projekt për shkak se prodhon me kosto 40% më të lartë se fqinjët nga taksat dhe tarifat e larta dhe jo vetëm kaq.
“Po çfarë gare do të fitosh në një Ballkan të hapur kur ti prodhon me kosto 40% më të lartë se fqinjët e tu nga taksat dhe tarifat e larta, dhe jo vetëm kaq por e paguan garuesin tënd 10 herë më pak se garuesit e tjerë për të njëjtin produkt dhe për të njëjtin treg” – shkruan Panariti.
Panariti gjithashtu thotë se këtë konkluzion kemi pa llogaritur hilet dhe mashtrimet gjatë garës, ku na hedhin fare lehtë hi syve, sepse nuk i zbulojmë ato dhe që ironikisht kjo quhet “garë e hapur” dhe konkurencë e lirë.
