“Ballkani i Hapur kërcënim për shqiptarët”/ Berisha takon përfaqësuesit e diasporës në SHBA

Kreu i Partisë Demokratike, Sali Berisha përmes një postimi në Facebook tregon detaje nga takimi me përfaqësues të njohur të diasporës në SHBA.

Berisha shkruan që gjatë takimit u diskutua dhe për kërcënimin që i vjen shqiptarëve nga “Ballkani i Hapur” dhe nga rreziku i vendosjes së monizmin në vend.

“Takim me përfaqësues të shquar të diasporës tonë në SHBA!

Të dashur miq, pata kënaqësinë e veçantë të mirëpres përfaqësuesit e shquar të diasporës tonë në SHBA, z. Paulin Mrnaçaj, President i Albanian American Advisory Council, Inc., bashkëshorten e tij, zj. Drita Vushaj dhe gazetarin e mirënjohur Beqir Sina.

Në këtë takim unë i shpreha mirënjohjen time të thellë zotit Mrnaçaj dhe miqve që e shoqëronin, për ndihmën e tyre të çmuar ndaj çështjes shqiptare, përmbysjes së diktaturës komuniste në Shqipëri, lirisë së Kosovës, dhe mbështetjen ndaj Partisë Demokratike që nga themelimi i saj deri më sot.

Në takim diskutuam gjerësisht mbi vendosjen e plotë të monizmit në Shqipëri, rrezikun e madh në të cilin ndodhet demokracia shqiptare, bashkëpunimin e PD me diasporën, dhe rolin jetik të kësaj të fundit për shpëtimin e Shqipërisë. Folëm gjithashtu për kërcënimin e madh kombëtar që paraqet për shqiptarët Ballkani i Hapur.

Takimi ishte i hapur dhe miqësor.”-shkruan Berisha.