Protesta e nisur nga banorët e Rinasit u mbyll ditën e sotme, pasi ARRSH njoftoi që rruga do të hapet ne dy senset e saj. Ndërkohë, ministrja e Infrastrukturës Belinda Balluku, përmes një video në rrjetet sociale, ka folur për lëvizjen e mjeteve në rrugën e Rinasit. Ajo ka thënë se rruga do vazhdojë lëvizjen me dy senset e saj, po apeloi drejtuesit e mjeteve që shkojnë drejt Veriut, që të shmangin këtë rrugë, që sipas saj është ndërtuar nga koncensionarët e parë të aeroportit të Rinasit, me qëllim transportin më të lehtë të qytetarëve, si dhe t’iu shërbejë banorëve të zonës.
“Rruga ka pasur një ngarkesë shumë të madhe, edhe për shkak të fluturimeve, gjë që ka bërë që qytetarët të rrezikonin humbjen e avionit. Banorët e zonës kanë shkollat çerdhet në këtë zonë, dhe aksesi nga rruga e Vorës do tju shtonte disa kilometra. Në krahun tonë të djathtë kemi një rrugë, që të çon drejt kullës së kontrollit. Të gjitha makinat që do të shkojnë të parkohen në Rinas do shkojnë nga kjo dalje. Do të desha të përfitoja nga rasti për të thënë disa fakte, çdo pasagjer që udhëton shoqërohet nga 2.3 udhëtarë të tjerë. Më shumë se 15 mijë udhëtarë gjatë ditës, nëse e shumëzojmë me 2.3, ju e kuptoni që fluksi ditor në këtë zonë është rreth 30 mijë persona, që kanë ndikuar në rritjen e fluksit në këtë rrugë. Një tjetër element i shtuar janë edhe universiteti epoka, dhe Tirana Buisnes Park. Kjo rrugë është ndërtuar vetëm për të aksesuar aeroportin e Rinasit, dhe me kalimin e viteve janë ndërtuar biznese të tjera që kanë shtuar trafikun”, tha ajo.
Ministrja njoftoi se ka nisur puna për një rrugë të re që të çon drejt aeroportit, me qëllim shmangien e vonesave të qytetarëve. Ajo që të bie në sy gjatë videos së Ballukut, është që ajo dyshohet të jetë xhiruar më parë se vendimi të komunikohej për banorët, pasi qarkullimi i mjeteve bëhet vetëm në njërën anë.
Discussion about this post