Ministrja e Infrastrukturës Belinda Balluku ka takuar sot Shoqatën e Transportit Publik nga ku kanë nisur të prezantojë propagandën e përsëritur çdo vit, lidhur me transportin informal. Ajo tha se, nga nesër policia do të dalë në terren me “grusht të hekurt” kundër transportit informal, automjeteve që veprojnë pa licencim.
“Policia e Shtetit duke nisur që nesër do të ketë një aksion për subjektet e palicencuara, automjetet private që hapin dyert për transport publik. Do ta bëjmë me grusht të hekurt, do të ndalojë njëherë e mirë i gjithë transporti i paligjshëm, që afekton negativisht transportin” tha ministrja.
Por kujtojmë se një premtim i tillë është dhënë edhe në vitet e mëparshme dhe më i fundit ishte në verën e viti të shkuar ku sektori i transportit publik u rikthye në punë pas pezullimit për disa muaj, për shkak të pandemisë. Gjithsesi sa do të realizohet ky premtim duhet të presim, por ministrja duhet të ketë parasysh se ky sektor ka një sërë mangësish të tjera, duke filluar që nga cilësia e shërbimit, linjat, e të tjerë.
