Një ngjarje e rëndë ka ndodhur në fshatin Strelcë të Maliqit, ku një banesë është përfshirë nga flakët dhe është shkrumbuar plotësisht. Si pasojë, një familje me fëmijë të mitur ka mbetur në qiell të hapur, pa strehë, pa të ardhura dhe pa asnjë mundësi për të jetuar në kushte minimale.
Në banesë jetonte kryefamiljari me tre fëmijët e tij të mitur dhe nënën e moshuar. Vetëm dy javë më parë, bashkëshortja e tij e kishte braktisur, duke marrë me vete një nga katër fëmijët dhe duke e lënë të vetëm me përgjegjësinë për tre të tjerët. Tani, edhe strehimi i tyre i vetëm është zhdukur nga flakët.
Zjarri dyshohet se është vënë qëllimisht. Kryefamiljari shprehet i bindur se nuk ka qenë aksident:
“E panë që unë u largova për në Korçë. Sapo ika unë, ia vunë flakën. Shtëpia ishte ngjitur me kasollen. U dogj gjithçka – nuk morëm dot as rroba, as dokumente, asgjë. Është e qëllimshme, ishte e përgatitur. E panë që ika…” – thotë ai.
“Kam tre fëmijë të mitur, duhet të kujdesem për ta. Ne duam vetëm një strehë pak më poshtë, më afër shkollës, sepse tani fëmijët e kanë shumë larg dhe nuk po e ndjekin dot shkollën.”
Dëmet janë të mëdha, ndërsa autoritetet janë informuar për ngjarjen. Shkaku zyrtar i zjarrit është ende nën hetim, por familja është aktualisht në kushte ekstreme dhe në nevojë të menjëhershme për ndihmë.
Apeli i kryefamiljarit është i qartë: ndihmë për strehim dhe kushte minimale jetese për të vazhduar kujdesin ndaj fëmijëve të tij.
Discussion about this post