Hilda Shijaku, ekonomiste e lartë në zyrën e Bankës Botërore në Tiranë, ka deklaruar ditën e sotme se institucioni ku ajo punon nuk e mbështet amnistinë fiskale. Sipas saj, ky hap do të çonte në përkeqësim të ekonomisë dhe nuk reflekton ndihmues për bizneset e vogla dhe familjeve në nevojë. Sakaq ajo këshilloi që qeveria të bëjë kujdes me shpenzime, si dhe me ndarjen e asistencës për familjet e varfra.
“Përgjithësisht ulja e taksave nuk ka targetim të mire. Bëhet me synimin e mirë për të ulur barrën e shportës së konsumatorit, por prek më shumë se çfarë është e synuar. Ka një efekt më të gjerë edhe te ata që nuk kanë nevojë për një gjë të tillë. Nga ana tjetër, skemat e asistencës sociale, kur janë të targetuar, shkojnë pikërisht aty ku duhet. Shqipëria vuan nga një bazë shumë e vogël tatimore. Të ardhurat publike janë ndër më të ulëtat në krahasim me vendet e rajonit”, u shpreh ajo.
Shijaku tha se, ajo çka rekomandohet është që qeveria të rrisë më tej mbledhjen e të ardhurave, duke ofruar edhe një lloj barazie në treg. “Është në dy drejtime: e para rritja e pajtueshmërisë tatimore. Ajo është potenciale kryesore në drejtim të rritjes së të ardhurave. Nga ana tjetër, edhe kuadri fiskal duhet të jetë i tillë që mos të krijojë mundësi për bizneset që të zgjedhin forma operimi për t’iu shmangur detyrimeve tatimore. Nëse duam të taksojmë, kemi parimet e barazisë, progresivitetit, të shohim se si aplikohet kjo te tatim paguesit në realitet”, shtoi Shijaku.
Pak ditë më parë edhe Fondi Monetar Ndërkombëtar i kërkoi qeverisë që të mos aplikojë më gjatë amnistinë fiskale, por të rrisë transparencën dhe të eliminojë informalitetin.
