Besimi i konsumatorëve dhe biznesit në ekonomi është në rënie për të tretin muaj radhazi në mars. Sipas vrojtimit të Bankës së Shqipërisë, treguesi i ndjesisë ekonomike ra më tej me dy pikë përqindje. Efektin kryesor në përkeqësimin e besimit e ka shkaktuar rritja e çmimeve dhe pritshmëritë për rritje të mëtejshme të tyre në të ardhmen.
Rënia u përcaktua nga përkeqësimi i besimit konsumator dhe i besimit të bizneseve në sektorin e tregtisë, por ajo u kufizua pjesërisht nga përmirësimi i besimit të bizneseve në sektorët e industrisë, shërbimeve dhe ndërtimit.Të gjithë sektorët e biznesit raportuan se presin rritje të çmimeve të tyre të shitjes në të ardhmen e afërt. Sipas vrojtimit të Bankës së Shqipërisë treguesi I besimit konsumatorë shënoi rënie prej 6.7 pikë përqindje.
Kjo rënie ka bërë që ky tregues të arrijë nivelin e dytë më të ulët historik pas minimumit që shënoi në fillimet e pandemisë. Ajo u ndikua sidomos nga pritjet për situatën ekonomike dhe situatën financiare. Situata inflacioniste ka bërë që pritjet e konsumatorëve për çmimet e konsumit në të ardhmen të shënojnë rritje.
Edhe treguesi i besimit në tregti ra me 1.5 pikë përqindje. Treguesi i ndjesisë ekonomike përmbledh perceptimin e bizneseve dhe konsumatorëve për gjendjen e tyre aktuale si dhe pritshmërinë për të ardhmen. Si i tille ai është një nga indikatorët udhëheqës më të rëndësishëm që projekton ecurinë e ekonomisë në vazhdim.
Discussion about this post