Kriza për punonjës mund të thellohet edhe më tej këtë vit, sipas paralajmërimit të Bankës së Shqipërisë në raportin e Politikës Monetare për tremujorin e parë të vitit.
Raporti thekson se rritja e ngadaltë e punësimit gjatë tremujorit të tretë të vitit 2024 është shoqëruar me nivele të larta të mungesës së forcës së punës. Po ashtu, të dhënat tregojnë se pritjet e bizneseve për punësimin janë më të ulëta, ndërsa konsumatorët presin rritje të papunësisë gjatë tremujorit të katërt.
Sipas të dhënave të Institutit të Statistikave, aktualisht janë 74,730 shqiptarë të regjistruar si të papunë në zyrat e punës. Pjesa më e madhe kanë arsim të mesëm, ndërsa rreth 7,000 kanë arsim të lartë.
Ergesta Stërmasi shprehet se duhet të inkurajohen të rinjtë të qëndrojnë dhe të hyjnë në tregun e punës, pasi, përndryshe, vendi do të përballet me shumë ditë të vështira. Nga ana tjetër, mbi 32,000 punëkërkues të regjistruar përfitojnë ndihmë ekonomike, ndërsa bizneset vazhdojnë të kërkojnë punonjës jashtë vendit.
Stërmasi shton se kjo është një zgjidhje afatshkurtër dhe një eksperiment, të cilin e kemi parë edhe më parë. Sipas saj, fokusi duhet të jetë te të rinjtë shqiptarë, pasi ka shumë kosto për sjelljen e punonjësve nga jashtë.
Banka e Shqipërisë thekson se rritja e pagave ka ngadalësuar në fund të vitit 2024, sidomos në sektorët e informacionit dhe komunikacionit, aktivitetet financiare dhe pasuritë e paluajtshme.
Discussion about this post