Banorët denoncojnë: Shpërthimet e guroreve vazhdojnë

Shpërthime të fuqishme janë dëgjuar rreth orës 17:45 minuta nga guroret që ndodhen sipër fshatit Borizanë të Fushë- Krujës.

Banorët të lagjes “Hima”, të cilët jetojnë pranë gurores kanë njoftuar policinë duke thënë se po u dëmtohen banesat.

Policia, bën me dije News24, u ka kërkuar banorëve që të shkojnë dhe të bëjnë denoncim në komisariat.

Banorët nuk kanë pranuar me arsyetimin se nuk kanë besim tek institucionet. Ata thanë se pavarësisht ngjarjes së rëndë të ndodhur pak kohë më parë, guroret vijojnë të kryejnë shpërthime, duke dëmtuar jo pak banesat.