Partizani ka triumfuar në takimin e parë të vlefshëm për turin e tretë kualifikues të Conference League. “Të kuqtë” fituan me rezultatin 2-1 përballë letonezve të Valmieras, duke treguar personalitet të fortë pas një pjese të parë, shumë të dobët, në të cilën ishin totalisht “në gjumë”.
Në fraksionin e parë, vendasit, bënë ligjin duke krijuar disa rreziqe, ndaj një Partizani që u duk se kishte ardhur në Letoni, me mendjen te miqësorja me Romën.
Në minutën e 27’ Silva, befasoi të gjithë duke realizuar një “eurogol” nga distanca.
Partizani nuk mundi të reagonte ashtu si duhej gjatë pjesës së parë, duke qenë i paqartë në iniciativën e vet.
Në pjesën e dytë, muzika ndryshoi plotësisht, me Partizanin që u fut në fushë, më i kthjellët edhe më i rrezikshëm, me Valmieran që mendoi më shumë për të mbrojtur portën.
Në minutën e 58’, pas shumë sulmesh, erdhi barazimi i shumë pritur, me Carën, që dërgoi topin në rrjetë.
Goli I dha akoma më shumë motivim Kampionëve të Shqipërisë, të cilët shtuan intensitetin e sulmeve në kërkim të golit të avantazhit.
Në të 76’ minutë, Partizani gjeti golin e dytë, me autor Rrapaj, i cili goditi nga distanca duke mposhtur portierin Olses.
Nga ky moment, Partizani mendoi vetëm të mbrohej, duke tentuar disa herë ndonjë kundërsulm. Megjithatë, sulmet e Valmieras nuk ishin efektive duke bërë që takimi të mbyllej me fitoren e ekipit shqiptar.
Pas një jave, djemtë e Zekic, do kërkojnë që të bëjnë detyrën pa shumë komplikime, për të arritur një kualifikim historik, për në fazën playoff./m.b /gijotina.com
Discussion about this post