Për të tetën ditë banorët e zonës së Laprakës kanë dalë në protestë duke bllokuar rrugën ku pritet të shemben 700 banesa. Banorët shprehen se janë prezantuar tre herë me projektet e Unazës së Madhe, por asnjëherë në mënyrë zyrtare.
Kërkesa e tyre është transparenca se çfarë do të ndodhë me këtë projekt dhe me banesat e tyre si dhe për procedurat që pritet të ndërmerren për banesat që kanë leje legalizim dhe ata që s’e kanë atë. Banorët kërkojnë gjithashtu të dinë edhe se si do të veprohet me shpërblimin që pritet të marrin ata.
“Kemi parë tre projekte deri tani, por asnjë në mënyrë legale,”- tha njëra nga banoret.
“Të dalin në televizor të paktën, se këtu tek ne nuk vijën kurrë, por të dalin e të na thonë në televizione se çfarë do të bëhet me ne, me dëmshpërblimet, kemi bërë legalizime,”- tha një tjetër.
“Nuk ka shtëpia sociale me dy vjet qira, se kujtojnë se mund të na mashtrojnë, nesër pasnesër vjen të nxjerr jashtë ai, nuk pranojmë shtëpia sociale,”- tha dhe një banor tjetër.
Protesta e banorëve ka nisur më 2 tetor, e që prej asaj ditë të gjithë dalin e bllokojnë rrugën për të kërkuar informacione lidhur me mënyrën sesi dhe me çfarë çmimi do të dëmshpërblehen pronat që do t’u shemben. Deri më tani nuk ka pasur asnjë njoftim zyrtar nga asnjë prej institucioneve.
