Banorët dhe tregtarët tek Pushimi i Shoferit në rrugën Lushnje-Fier kanë protestuar ditën e sotme lidhur me vendimin e ARRSH-së për mbylljen e hyrje daljeve të rrezikshme. Sipas protestuesve kjo do të dëmtonte ata, pasi iu duhet të lëvizin për të transportuar mallra. Ata kërkojnë një zgjidhje për mes një rruge dytësore në mënyrë që të mund të lëvizin lirshëm.
Problem për protestuesit mbetet dhe propozimi i ARRSH-së, ku kërkon pajisjen me lejen e biznesit, pasi kjo kërkesë do të iu kushtonte atyre shumë para. Në mbështetje të tyre ishin dhe deputetë të Partisë demokratike Luan Baçi dhe Saijmir Koreshi, të cilët theksuan se do të adresojnë në seancën e ardhshme plenare këtë padrejtësisë ndaj qytetarëve të zonës që ata përfaqësojnë.
I bëj thirrje sot ARRSH-së, ministres Baluku dhe gjithë të tjerëve, të kthejnë kokën sepse janë mbi 500 biznese në të dy anët. Është fuqi ekonomike për më tepër, përveç bujqësisë këto janë bizneset e vetme në Lushnje buzë autostradës”, u shpreh Koreshi.
Ndërsa Baçi akuzoi se policët rrugor në këtë aks po përdorin këtë situatë për të marrë rryshfet.
“Përveç lejes që ata duhet të paguajnë tarifë shtetërore, absolutisht iu kërkojnë para nën dorë dhe këtë e thonë të gjithë, hapur tashmë, për të marrë një leje. 30 mijë euro të marrësh leje, kjo është një korrupsion i hapur, banditizëm i kësaj qeverie si në çdo veprim që bëjnë dhe vazhdojnë iu bëjnë presion bizneseve dhe qytetarëve.”
Autoriteti Rrugor Shqiptar njoftoi se do të ndërmarrë një aksion për evidentimin dhe mbylljen përfundimtare të të gjitha hyrjeve dhe daljeve të rrezikshme të cilat nuk plotësojnë standardet në rrjetin rrugor kombëtar. Në bashkëpunim me policinë, ARRSH përmes një njoftimi për medien bën me dije se aksioni konsiston në mbylljen me mbrojtëse anësore metalike dhe hapjen e kanaleve anësore të mbyllura në mënyrë të paligjshme nga ana e bizneseve në anë të rrugës.
Discussion about this post