Banorët Zharrzës në Patos vuajnë për ujë, ndërsa procedurat e tenderit për stacionin e ujësjellësit në Belinë po zvarriten për shkak të abuzimeve të kryebashkiakut Fation Duro. Kështu, prokurimi me objekt “Ndërtim i stacionit të pompimit Belinë” u stërzgjat pasi ka kaluar në disa faza përfshirë anulimet. Objekti përfshihet në Njësinë Administrative Zharrëz, i cili merr ujë nga lumi i Semanit dhe ndodhet jo shumë larg fshatit Belinë.
Pra, në një distancë të afërt mund të ishte mundësuar më herët ky shërbim për qytetarët e kësaj zone të cilët kanë mbi 15 vjet që vuajnë për ujë të pijshëm. Por, edhe këtë herë që çështja u vu në agjendën kryetarit Duro, tenderi ka një sërë shkeljesh, që vështirë të lejojnë zhvillimin e një pune sipas planit.
Për këtë tender janë lënë në dispozicion 131 milionë lekë, që mbase nuk janë pak për të ndërtuar një stacion pompimi, por duhet të marrim me mend firot për shkak të korrupsionit, përpara se të nisë zbatimi në terren.
Gara për këtë tender është hapur më datë 19 mars 2024, por vetëm më datë 3 maj është bërë i mundur nënshkrimi i kontratës dhe sërish e skuqur nga shkeljet. Në dokumentin e paraqitur nga Open Data Albania, në mënyrë të jashtëzakonshme është vlerësuar tenderi me dy “Flamuj të kuq”. Rikujtojmë se kjo është shenja që tregon riskun e lartë të korrupsionit.
Krahas njërit “Flamur” përshkruhet se ky tender është anuluar më shumë se dy herë. Cilado qofshin arsyet, një tender që anulohet më shumë se dy herë duhet të pezullohet dhe të rishikohen dokumentacionet për të hapur një prokurim të ri.
Ndërsa “Flamuri” tjetër qenka “fituar” nga Duro pasi ka skualifikuar të gjithë konkurrentët përveç fituesit.
Duro nuk ka pyetur shumë se çfarë thotë ligji mbi prokurimet dhe ka vazhduar procedurat, me shkelje të tjera. Shohim që deri më datë 4 prill 2024, kur ka qenë afati i fundit i dorëzimit të ofertave, kanë shfaqur interes 5 firma, por 4 u eliminuan automatikisht nga gara madje, edhe kompania me ofertën më të lirë dhe më ekonomike.
Pra, më 4 prill 2024, mbi tryezën e kryetarit mbeti vetëm zarfi me propozimet e firmës “GBK” shpk. Për një muaj Duro e ka mbajtur në sirtar emrin e fituesit, pasi me mungesën e konkurrencës i kishte shtuar edhe një tjetër ‘Red Flag’ vlerësimit për procedurën. Megjithëse valëviteshin dy “flamuj të kuq”, ku janë shkelur rregullat kryesore të procedurave tenderuese, APP e ka regjistruar kontratën e bërë publike më datë 3 maj 2024.
Teksa Duro abuzon me tenderat dhe fondin, banorët vazhdojnë të vuajnë për ujë të pijshëm.
Çdo vit njerëzit e kësaj zone kanë protestuar për mungesën e ujit, sidomos gjatë verës kur situata rëndohet për shkak të thatësirave. Më 22 korrik të viti të shkuar, banorëve iu premtua se do t’iu dërgohet një pompë uji, por bashkia akoma nuk e ka ndërtuar stacionin.
Banorët e Zharrzës, jo vetëm që nuk kanë ujë të pijshëm, por u faturohet nga ujësjellësi sikur ta kishin konsumuar. Ankesa iu bë kryetari Duro në takimin për konsultimin mbi ndarjen e buxhetit të bashkisë patos për vitit 2024.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post