Niveli i lumit Vjosa ka rënë këtë mëngjes, ndërkohë dhjetëra hektarë tokë bujqësore dhe banesa janë nën pushtimin e ujit. Edhe pse situata paraqitet më e qetë. Uji është larguar nga banesat, duke lënë pas baltë dhe llum. Gjatë natës, banorët kanë qëndruar te familjarët e tyre.
Banorët e përmbytur apelojnë për ndihmë, ndërkohë që thonë se dëmet janë të konsiderueshme, uji u ka shkatërruar pajisjet elektroshtëpiake.
Ndonëse kryeministri Rama mëngjesin e sotëm njoftoi se do të vizitonte familjet e përmbytura, për të vëzhguar nga afër problematikat, deri në këto momente përveç show të ofruar, nuk i ka vizituar ato banorë.
“Çfarë do të bëj, le të marrë masa qeveria. Të shikoj qeveria mirë të marri mas, shiko si janë bërë ujë. Çfarë tu bëj këtyre? Shikoji. Ka fjetur djali në ujë, djalin e kam të sëmurë ndaj kam nevojë për ndihmë nga qeveria.
Jetoj vetëm me djalin, por e ka të çarë kokën, pa pension, pa gjë” – shprehet banorja në Fier.
“Pompa nuk punon, ka qenë poshtë në tokë dhe nën masë, nën korent. Kam dëme brenda banesës, e patë vet, çfarë të bëjmë… Të bëj shteti tani çfarë të dojë, shteti të hap kanalin këtu, se është kulluesi atje në fund dhe të iki uji. Rrugë tjetër s’ka”, thotë një tjetër banore e përmbytur.
“Ja dollapi i rrobave është mbushur deri atje poshtë. Harrova të ngreja edhe perdet dje nga nxitimi, se erdhi pandehur ai. Erdhi menjëherë. Është e katërta herë që na zë, cfarë të bëjmë”, tregoi një tjetër banore.
“ Që në pesë të mëngjesit kemi filluar sot, me fshesë me zorrë me ujë. Pompa na u dogj, po marrim nga ai komshiu matan. Korenti nuk na është ndërprerë. Brenda? Eja shiko në dhomë e gjumit, i kemi nxjerr gjitha jashtë” u shpreh një banor i Fierit.
Edhe pse një situatë e cila përsëritet çdo vit, institucionet përgjegjëse nuk japin një zgjidhje për këtë problematikë.
Discussion about this post