Ashtu sikur paralajmëruan dy ditë më parë, banorët në zonën e Laprakës në Tiranë kanë dalë sërish në protestë për punimet që bëhen në Unazën e Madhe.
Të revoltuar dhe me thirrje kundër qeverisë ata bllokuan 2 prej rrugëve kryesore të zonës. Për afro 40 minuta nuk lejuan drejtuesit e mjeteve të kalojnë duke shkaktuar edhe trafik.
Në një prononcim për mediet, banorët thonë se ky reagim erdhi pas indiferencës së autoriteteve për të dhënë më shumë informacion lidhur me projektin e Unazës së Madhe të kryeqytetit që në këtë zonë prek rreth 700 shtëpi.
Ata shprehen se janë pro ndërtimit të rrugës, por me kusht që projekti të konsultohet edhe me ta, si dhe t’u jepet dëmshpërblim për banesat që prishen.
“E bllokuam rrugën sot sepse kërkojmë transparencë nga bashkia dhe nga shteti shqiptar pasi ne jemi qytetarë të këtij shteti dhe kërkojmë të drejtën tonë. Në lagjen tonë nuk është prezantuar akoma asnjë projekt. Të na kthejnë një përgjigje, ta dimë se ku do bjerë rruga, sa gjerësi është. Nuk ka problem, rrugën ta bëjnë ata. Ne të na japin dëmshpërblim. Kjo qeveri është e pabesë qëkur ka ardhur në pushtet”, shprehen ata.
Ata deklaruan se, protestat e tyre do të përshkallëzohen nëse nuk marrin përgjigje për shqetësimet e ngritura. Pasi, pretendojnë s e projekti ka ndryshuar disa herë, ndërsa institucionet kanë njoftuar për shembjen e banesave vetëm ata që posedojnë certifikatë pronësie.
