Në 6 mars, kandidati i Komisionit të Rithemelimit Bardh Spahia fitoi bashkinë e Shkodrës për ta nxjerrë nga problemet me abuzimin me fondet publike por sinjalet që vijnë nga tenderi i organizuar nga U.K.SH nën firmën e Mark Molla për blerje kimikatesh dhe reagentësh nuk janë pozitive.
Kandidati i përzgjedhur nga partia e Sali Berishës solli idenë për një frymë të re, ndryshe nga Voltana Ademi për një rikonceptim të kryeqendrës së veriut të Shqipërisë por menjëherë kanë filluar të shfaqen shkeljet e para të vjetra në shpërndarjen e parave publike të krijuara nga taksat e qytetarëve.
Pas tenderit të shërbim me roje private pa garë i fituar nga kompania “Miri” shpk me numër REF-25700-04-20-2022, radhën e ka kompania “2 AT” shpk e cila ka fituar garën duke u skualifikuar konkurrenti “ALBANIA DISTRIBUTION CHEMICALS ” shpk edhe pse solli ofertë fituese më të ulët me vlerë 56 milionë lekë të vjetra pa TVSH, 4 milionë më pak se fituesi. Kjo ofertë ishte me leverdi për taksapaguesit shkodranë por mesa duket jo për U.K.SH e cila ka menduar t’ia japë ofertës fituese me vlerë 98% të fondit limit.
Procedura e prokurimit me numër REF-25488-04-15-2022 me ofertë fituese prej 60 milionë lekësh të vjetra pa TVSH nga “2 AT” shpk është shënuar me flamur të kuq nga Open Data pasi ka dyshime të forta për korrupsion dhe klientelizëm në dëm të parave publike.
Pasojat negative nuk vijnë vetëm nga mënyra se si përzgjidhet fituesi por edhe nga dyshimet se shkeljet e procedurave të prokurimit pasohen zakonisht dhe shumëfishohen në zbatimin e kontratës. Për këtë si kambanë alarmi na shërben raporti i KLSH për vitin 2021 i publikuar para një muaji, i cili tek dëmet ekonomike rendit jo vetëm procedurat e prokurimit me shkelje por edhe zbatimin e kontratave.
Kontrata e mësipërme është firmosur më kompaninë “2 AT” shpk e cila ka përfituar një numër të lartë kontratash nga bashkitë në republikën e Shqipërisë si dhe nga ndërmarrjet e ujësjellësave.
Shpallja e fituesit është bërë në 13 maj ku kompania “ALBANIA DISTRIBUTION CHEMICALS ” shpk është skualifikuar pasi dokumenti ”Akti i Autorizimit të Produktit Biocid” nuk është paraqitur në formën e kërkuar nga ligji, pasi ky dokument është fotokopje.
“Cdo dokument i skanuar duhet të jetë origjinal ose kopje e noterizuar, në të kundërt dokumenti është i pavlefshëm, prandaj kriteri kualifikues i përcaktuar në kriteret për kualifikim të DST-ve, që ka të bëjë me lejen e importimit të hipokloritetit të natriumit, nuk plotësohet”, shkruhet tek arsyet e skualifikimit të kompanisë.
Dyshimet janë se tenderi mund të jetë i fiksuar për fituesin pasi skanimi i dokumenteve origjinale është një praktikë e zakonshme për të marrë pjesë në procedurat e prokurimit.
Dyshimet përforcohen kur nga kërkimet e redaksisë zbulojmë se ky nuk është i vetmi tender me flamur të kuq por në të njëjtin institucion, te Ujësjellës Kanalizime Shkodër për të njëjtin shërbim është nënshkruar kontrata me ofertë fituese 71 milionë lekë të vjetra me TVSH me numër REF-87635-02-19-2021 në datë 28 prill.
Në këtë tender janë skualifikuar pjësëmarrësit ku përsëri shfaqet kompania “ALBANIA DISTRIBUTION CHEMICALS ” shpk e cila ka bërë ankesë për të modifikuar dokumentat e tenderit. Në 26 mars Komisioni i Prokurimit Publik ka pranuar pjesërisht ankesën duke modifikuar disa dokumenta por përsëri kjo kompani është skualifikuar sepse nuk ka paraqitur lejen e importit për hipokloritin e natriumit.
Por skualifikimi nuk mbaron me kaq sepse janë skualifikuar edhe kompanitë “Krijon” shpk dhe “Isometric” shpk duke paraqitur vetëm ekstraktin e Qendrës Kombëtare të Biznesit, duke mos përmbushur asnjë kriter kualifikues të vendosur në “’kriteret kualifikuese” në tender. Kompania “Krijon” shpk nuk është hera e parë që shfaqet në procedurat publike vetëm për t’u shënuar si pjesëmarrëse sepse ka bërë gabime të cilat janë amatore pasi nuk shkohet në konkurrim pa patur dokumentat standart.
Kompania “2 AT” shpk ka fituar të paktën 12 tendera me vlerë 357 mijë euro pa TVSH të cilët janë të shënuar me flamur të kuq nga Open Data Albania pasi ka dyshime të forta për korrupsion dhe klientelizëm në dëm të fondeve publike.
Discussion about this post