Gazment Bardhi, Kryetar i Grupit Parlamentar të PD-së, ka reaguar përmes një deklarate lidhur me atë se çfarë ndodhi gjatë seancës plenare, ku Kuvendi rrëzoi kërkesat e opozitës për Komisione Hetimore, por gjithashtu Kryeparlamentarja Lindita Nikolla, bëri të ditur dy njoftime nga Lulzim Basha, mbi përbërjen e grupit parlamentar dhe përjashtimin e Gazment Bardhit prej tij.
“Nervozizmi i Edi Ramës për unifikimim e qëndrimit të Shqipërisë me atë të Kosovës, nuk u shfaq vetëm me mungesën e tij skandaloze në votimin për Rezolutën për dënimin e Serbisë, por edhe nga sjellja e paprecedentë e Kryetares së Kuvendit në fund të seancës së sotme të posaçme.
Marrja peng nga Edi Rama e Reformës Zgjedhore dhe rrëzimi i Komisioneve Hetimore të kërkuara nga opozita, si dhe ndërhyrja në kundërshtim me Rregulloren e Kuvendit e Kryetares së Kuvendit në punët e brendshme të grupit parlamentar të PD, përbën aktin më të pashembullt në historinë e pluralizmit politik që mbyll çdo hapësirë institucionale për opozitën në Parlament”, deklaron Bardhi.
Reagimi i tij erdhi pasi, në mbyllje të seancës plenare dedikuar çështjes së Kosovës, kryeparlamentarja Lindita Nikolla ka lexuar një njoftim të ardhur nga Lulzim Basha, ku thuhet se Gazment Bardhi nuk është më anëtar i grupit parlamentar të PD-së.
Lindita Nikolla lexon njoftimin e ardhur nga Lulzim Basha: Bazuar në detyrimin ligjor të pikës 2 të nenit 16 të rregullores së Kuvendit, në mbështetje të vendimit të Kryesisë së PD-së, bazuar në nenet 22, 26 dh 48 të statutit dhe nenit 3 të rregullores së brendshme të grupit parlamentar të PD-së, ju informojmë se Gazment Bardhi nuk është më pjesë e grupit parlamentar të PD-së duke filluar që nga data 9 Tetor 2023, si pasojë e mbarimit të anëtarësisë së PD-së.
Discussion about this post