Bardhi: Askush nuk është mbi ligjin, qoftë ky edhe Edi Rama

Deputeti demokrat Gazmend Bardhi u shpreh se drejtësia shqiptare duhet të sqarojë marrëdhëniet e kryeministrit Edi Rama me McGonigal, pas pranimit të fajësisë së këtij të fundit para drejtësisë amerikane, mbi lidhjet korruptive me Shqipërinë

Postimi:

Veprat janë ato që mbeten! Më 24 janar 2023 kam kallëzuar në SPAK, Edi Ramën, mbi dosjen amerikane të ish- zyrtarit të lartë të FBI-së, Charles McGonigal.

Ai i ka shërbyer Edi Ramës për interesat e tij politike dhe si shpërblim, është paguar prej Edi Ramës me para të zeza.

Pranimi i fajësisë nga McGonigal, duke shpjeguar se marrëdhënien me Edi Ramën e krijoi për efekt të biznesit, bëjnë urgjente një përgjigje edhe nga drejtësia shqiptare.

Drejtësia amerikane ka provuar dhe ish-zyrtari i FBI-së ka pranuar se në takimin me Edi Ramën në shtator 2017, ai kishte shfaqur interes për një koncesion shumë të madh në fushën e naftës, me lidhje indirekt me gjigandin rus të naftës GAZPROM.

Gjashtë muaj pas këtij takimi, në mars 2018, Ministria e Energjisë shpalli fitues për koncesionin e tre fushave naftëmbajtëse në jug të Shqipërisë, kompaninë Transoil Group AG, të lidhur me miqtë e McGonigal.

Gjykatat shqiptare kanë konstatuar se përzgjedhja e kompanisë në koncesionin e tri fushave naftëmbajtëse në jug të Shqipërisë u krye nën favorizim dhe shkelje të barazisë në tender.

SPAK ka detyrimin që të informojë opinionin publik mbi fazën ku ndodhet hetimi mbi këtë çështje.

Shqiptarët kanë të drejtë të dinë, nëse SPAK-u i ka kërkuar apo jo drejtësisë amerikane të dhënat e dosjes si dhe t’i përgjigjet pritshmërisë së qytetarëve për barazi para ligjit.

Shkëmbimi i ndërsjellë i favoreve midis Edi Ramës dhe McGonigal është njësoj krim si në SHBA, edhe në Shqipëri.

SPAK duhet të na provojë se askush nuk është mbi ligjin!

Askush! Përfshirë Edi Ramën!