Gazment Bardhi, kreu i Grupit Parlamentar të PD-së, ka thumbuar Lulzim Bashën, i cili prej disa muajsh ka marrë drejtimin e asaj që njihet si PD e vulës, ndonëse u zgjodh me një proces të kontestuar nga shumica dërmuese e anëtarëve të Këshillit Kombëtar dhe deputetëve demokratë.
Bardhi në një reagim tha se Basha ka zgjedhur të qëndrojë në shtëpi dhe të marrë rrogën, madje ka zgjedhur të “përballet” me Kryeministrin Edi Rama nga divani i shtëpisë.
Grupimin që mbështet Bashën, Bardhi e ironizon si “kërpërata 2024”.
“Lulzim Basha dhe deputetët krah tij, të mos shërbejnë si ‘korpërata’ e 2024-ës. Më mirë të ndez tymuese në Kuvend, sesa të rri në shtëpi.
Lulzim Basha qëndron në shtëpi, ndërkohë merr dhe rrogën. E njoh më mirë se kushdo tjetër Bashën e besoj se dhe ai më njeh dhe e di që unë nuk luaj kurrë për interesin tim personal.
Unë kam zgjedhur përballjen me Ramën. Ti ke zgjedhur të ‘përballesh’ me Kryeministrin, nga divani i shtëpisë”, tha Bardhi.
Reagimi i Kreut të Grupit Parlamentar të PD-së është në vijim të reagimeve ndaj deklaratave të një dite më parë nga Lulzim Basha, i cili ironizoi aksionin opozitar në Kuvend, duke u shprehur kundër tymueseve dhe flakadanëve. Madje Basha e cilësoi këtë aksion si një shoë që i shërben Edi Ramës dhe interesave personale të atyre që janë rreshtuar në krah të Sali Berishës dhe jo opozitës e shqiptarëve.
Discussion about this post