Një rast i pazakontë ka rikthyer debatin mbi ligjet e emigracionit në Mbretërinë e Bashkuar, pasi shqiptari Klevis Disha ka fituar të drejtën për të qëndruar në vend, duke argumentuar se deportimi do të kishte pasoja të rënda për djalin e tij.
Disha, 39 vjeç, kishte hyrë ilegalisht në Britani në vitin 2001 si i mitur dhe kishte përdorur identitet të rremë për të kërkuar azil. Pavarësisht se kërkesa e tij fillestare u refuzua, pas një procesi të gjatë ai përfitoi leje qëndrimi të përhershme në vitin 2005 dhe krijoi familje me një partnere me origjinë shqiptare, me të cilën ka dy fëmijë.
Problemet ligjore nisën në vitin 2017, kur ai u dënua me dy vite burg pasi u kap me 250 mijë paund të cilat konsideroheshin të ardhura nga aktivitet kriminal. Sipas ligjit britanik, ky dënim e bënte automatikisht subjekt deportimi.
Megjithatë, çështja mori një kthesë të papritur gjatë apelimit. Avokati i tij, Richard McKee, argumentoi se largimi i Dishës nga vendi do të ishte “jashtëzakonisht i ashpër” për djalin e tij 11-vjeçar, i cili ka vështirësi me ushqimin dhe një dietë shumë të kufizuar. Një nga argumentet që tërhoqi vëmendje ishte fakti se fëmija nuk pranon të hajë ushqime të caktuara jashtë Britanisë, përfshirë edhe kotëletat e pulës.
Fillimisht, një gjykatë e rrëzoi këtë pretendim, duke e cilësuar si të pabazë. Por pas një serie seancash që zgjatën më shumë se një vit, gjyqtari Judge Veloso vendosi në favor të Dishës, duke u mbështetur në nenin 8 të Aktit për të Drejtat e Njeriut, që garanton të drejtën për jetën familjare.
Gjykata vlerësoi se djali i tij ka ndjeshmëri ndaj teksturave të ushqimit dhe një regjim shumë të kufizuar ushqimor, duke e bërë zhvendosjen në Shqipëri një sfidë serioze për mirëqenien e tij.
Discussion about this post