Kreu i grupit parlamentar të PD-së, Gazment Bardhi, gjatë mbledhjes së Këshillit të Mandateve, ka pyetur kreun e SPAK, Altin Dumani, nëse ka informacione se ku ndodhet deputeti Arben Ahmetaj, për të cilin Prokuroria Speciale kërkon autorizimin nga Kuvendi për ta arrestuar.
Ahmetaj përfaqësohet në seancën e Këshillit nga dy avokatët Henrik Ligori dhe Ardian Visha.
Ndërsa Dumani parashtronte kërkesën për arrestimin e Ahmetajt, Bardhi e ka pyetur nëse ka informacione për vendndodhjen e tanishme të ish-zv.Kryeministrit. “Ku ndodhet Ahmetaj në Shqipëri apo Kanada”, iu drejtua Bardhi, Dumanit.
Më herët Gazment Bardhi u përfshi në debate me deputeten Ermonela Felaj, e cila ka mbështetur SPAK për zhvillimin e mbledhjes së Këshillit me dyer të mbyllura.
“Emri yt është në këtë dosje. Ti ke frikë sepse emri yt është në dosje. Lëri njerëzit të kuptojnë që ti njësoj si Ahmetaj ke qenë pro ndërtimit të inceneratorëve. Je në konflikt interesi!
Mazhoranca ka frikë që shqiptarët të mësojnë të vërtetën për inceneratorët. Po ndihmon Ahmetajn që të arratiset dhe SPAK mos ta kapë atë”, iu drejtua Bardhi, deputetes së PS.
Discussion about this post