Nënkryetari i selisë blu, Gazment Bardhi ka deklaruar se ashtu si Evis Berberi, kreu i ARRSH u arrestuar, edhe Drejtori i Tatimeve, Ceno Klosi e ka vendin në burg.
Nga Dibra, ku u zhvillua një takim me demokratët, Bardhi tha se Ceno Klosi dhe Evis Berberi ishin dy personat që i mbronin shpatullat ministres Balluku duke i blerë vota.
“Një tjetër leksion që kemi marrë nga Dibra dhe u përpoqëm që ta bëjmë realitet, ishte nevoja për bashkim. Sa herë që keni qenë të bashkuar, e keni mundur PS. Lajmi i mirë për demokratët e Dibrës dhe të gjithë demokratëve në mbarë Shqipërinë, është që pas 2 vitesh, PD është më e bashkuar dhe më e fortë, gati për t’u përballur me betejën për zgjedhjen e 2025-ës. Nëse do të masësh qeverisjen e Ramës, shiko Rrugën e Arbrit.
Rruga është gjysmë e shkatërruar, dhe e painuguruar. Paratë shkojnë te xhepat e ministrave dhe drejtorëve, që më pas me paratë e korrupsionit, vinë dhe blejnë qytetarët. Shembullin e keni në 14 maj.
Kush ishin dy njerëzit që mbulonin shpatullat e Belinda Ballukut? Evis Berberi, që nuk ka lënë derë pa blerë vota. Dhe Ceno Klosi, i pari i Tatimeve, që do të ketë fatin e atij të parit. E ka vendin në burg. Ky është modeli që ka ngjallur Edi Rama. Skemën e ndihmës ekonomike në disa raste mund ta përdorë dhe për blerje votash, por varfëria është shtuar”, tha Bardhi.
Discussion about this post