Kreu i grupit parlamentar të Partisë Demokratike, Gazment Bardhi, ka ngritur në Konferencën e Kryetarëve çështjen e pagave të magjistratëve, duke akuzuar Kuvendin për moszbatimin e vendimit të Gjykatës Kushtetuese.
Bardhi iu drejtua kryetarit të Kuvendit, Niko Peleshi, duke deklaruar se situata e krijuar në gjykata lidhet me moszbatimin e vendimit që kërkon një formulë të re për llogaritjen e pagave të magjistratëve.
Sipas tij, për këtë çështje ekziston edhe një vendim i Këshillit të Legjislacionit për zbatimin e vendimit të Gjykatës Kushtetuese, por Kuvendi nuk ka ndërmarrë veprimet përkatëse.
“Sot gjykatat janë në kolaps pikërisht sepse ju nuk respektoni Kushtetutën. Ka një vendim të Gjykatës Kushtetuese për pagat e gjyqtarëve dhe ju nuk merreni me atë çështje. Për ju nuk ka rëndësi Kushtetuta. Ka një vendim të Këshillit të Legjislacionit për të zbatuar vendimin e Gjykatës Kushtetuese, por ju nuk veproni. Pasojat janë se gjyqtarët janë pa paga dhe sot gjykatat janë në krizë. Përgjegjës është Kuvendi, i cili nuk respekton vendimet e Gjykatës Kushtetuese”, tha Gazment Bardhi.
Kreu i grupit parlamentar të PD-së e vijoi përplasjen me Peleshin duke e akuzuar se po vendos aktet e qeverisë mbi Kushtetutën.
Bardhi e lidhi këtë akuzë edhe me nisjen e sesionit të ri parlamentar. Sipas tij, Kuvendi duhej ta kishte nisur sesionin një ditë më parë, ndërsa akuzoi Peleshin se si mbyllja e sesionit të kaluar, ashtu edhe nisja e sesionit të ri, janë bërë në shkelje të Kushtetutës.
“Ju jeni kryetari i Kuvendit i vetmi në histori që konsideroni më të rëndësishëm zbatimin e një akti qeveritar sesa Kushtetutën. Në hierarkinë e normave ju nuk vendosni Kushtetutën e Shqipërisë, por urdhrat e Këshillit të Ministrave. Na folët këtu se si do të jetë sesioni i ri parlamentar, por ju po e nisni këtë sesion duke shkelur Kushtetutën. E mbyllët sesionin e kaluar duke shkelur Kushtetutën, tani po e nisni me shkelje kushtetuese. Do të duhej që ky Kuvend ta niste sesionin dje. Po ju nuk jeni serioz, nuk e njihni Kushtetutën”, tha Bardhi.
Discussion about this post