“Fytyra e Djallit Shqiptar” është emri që kemi parë të qarkullojë në mediat botërore gjatë kësaj jave. Djali në fjalë për të cilin ka reaguar edhe kryeministri britanik Boris Johnson, Selamet Mehmetaj, ka dhënë intervistën e tij të parë pas kamerës së fshehtë nga “Daily Mail”.
Për RTV Ora, ai rrëfeu të vërtetën e tij mbi trafikun e drogës dhe rrëmbimin e një personi që i preu dy gishta, duke thënë se ka qenë në dijeni për xhirimin.
“Kjo ka dalë nga kamera e fshehtë e “Daily Mail”. Por të vërtetën do ta sqaroj tani. Nuk ka të bëjë me “Baron Droge”. Ajo ka qenë një kamera e fshehtë, që unë e dija se po më xhironin dhe i dhashë një histori që donte ai. Kur u takova me atë personin, ai ishte gazetar, vura re se kishte një triko me pulla , dhe e pashë që kishte kamerën e fshehur, dhe kur u ktheva nga krahu i majtë, pashë dhe një person tjetër që po më filmonte. Unë thjesht nuk ia vura re, i dhashë atë që ai donte të merrte nga unë. I thashë një super shaka të paparë, që asnjë nga ato nuk janë të vërteta”, u shpreh Mehmetaj.
Ai mohoi të jetë i përfshirë në trafikun e drogës, ndërsa tha se punon si hidraulik.
“Unë jam hidraulik. Kam kompaninë time, ndërtoj shtëpi. Më shumë merrem me hidraulik por ndërtoj dhe shtëpia. I prish, i rregulloj dhe i bëj të reja. Gjithmonë kam dashur të bëhem inxhinier gazi. Kam shumë vite që e bëj këtë punë”, tha ai.
Disa ditë më parë, 28-vjeçari shpjegonte se si çdo muaj ai furnizon tregtarët në të gjithë Mbretërinë e Bashkuar me 2,500 bimë kanabis dhe mbledh sytha për t’i shitur. Gjithashtu ai nuk ka nguruar të tregojë edhe kur ata e kanë tradhtuar duke u mburrur me faktin se si i preu 2 gishta një klienti i cili nuk e pagoi, deklarata të cilat tani i hodhi poshtë.
