Pasi ish-kryeministri Sali Berisha nga takimi me demokratët në Fier e quajti kukull të Edi Ramës, ka reaguar ashpër kryedemokrati Lulzim Basha.
Në një deklaratë për mediat nga selia blu, Basha tha se kjo nuk është e vërtetë dhe se misioni i PD është largimi i këtij regjimi.
“Për 8 vite me radhë Edi Rama më ka akuzuar për kukull të Edi Ramës. Dje, Sali Berisha më ka akuzuar për peng të Edi Ramës. E para është gënjeshtër, e dyta nuk do të ndodhë kurrë. Të dyja janë dy anë të të njëjtës medalje. Partia Demokratike po ecën përpara, Partia Demokratike do t’i prijë betejës popullore për ndryshim që vjen vetëm përmes largimit të këtij regjimi dhe kthimit të vendit në shinat e demokracisë të cilat sigurojnë një jetë të mirë për çdo shqiptar. Ky është misioni i Partisë Demokratike, ky është misioni i çdo demokrati, ky është misioni im dhe këtij do t’i qëndroj me përkushtim deri në arritjen e objektivave që nuk janë thjesht partiake, por janë partiake”.
Pas deklaratës së Berishës për mbledhjen e Kuvendit Kombëtar, kreu i opozitës është përgjigjur i prerë duke thënë se nuk do lejojë Kuvende që marrin në shqyrtim vendimet e SHBA.
“Sa u përket pretendimeve për referendume dhe kuvende, kuvend të Partisë Demokratike për të marrë nën shqyrtim vendimet e qeverisë amerikane nuk ka për të pasur. Objektivat tona janë përballja me Edi Ramën dhe regjimin e tij dhe e gjithë energjia jonë është e fokusuar këtu. Nuk ka për të pasur kuvend të Partisë Demokratike që shqyrton vendimet e qeverisë Amerikane”, tha Basha.
Ditën e djeshme, ish-kryeministri Berisha zhvilloi një takim me demokratët e bazës në Fier ku hodhi akuza të forta ndaj Bashës, madje duke e akuzuar si kukull të kryeministrit Rama.
