Selia e Partisë Demokratike ka vendosur që të nisë 2022 me një “faqe të re”. Kryedemokrati Lulzim Basha ka vendosur që të bëjë disa ndryshime të vogla në fasadë. Dera e hyrjes kryesore dhe xhamat e selisë janë veshur sot me letër ngjitëse me logon dhe simbolet e PD, të gjitha në ngjyrë “royal blue”.
Këto ndryshime vijnë 2 ditë para përfundimit të afatit të vendosur nga ish-kryeministri Sali Berisha për lirimin e zyrës nga ana e Bashës. Sipas Berishës, numri një i PD nuk e mban më atë post që prej 11 dhjetorit, ndaj dhe ka paralajmëruar se do të largohet “butësisht” më 5 janar.
Nga ana e tjetër, kryetari i Partisë Demokratike, e ka injoruar ultimatumin dhe është shprehur gati për të gjithë “skenarët”. Deri tani kryedemokrati nuk e ka ndryshuar qasjen e tij, duke mos njohur vendimet e komisionit të dalë nga Kuvendi Kombëtar i 11 dhjetorit, që mes të tjerash vendosi edhe shkarkimin e tij.
Për të përforcuar qëndrimin e tij Basha zbriti në terren ku zhvilloi një takim me demokratët në Dibër. Por Komisioni i Rithemelimit nuk heq dore nga përpjekja për ta larguar atë nga drejtimit i partisë.
Bravat e ndërruara nuk e penguan Sali Berishën që të futej në selinë e PD dhe në rast se Basha nuk respekton vendimin e Komisionit të Rithemelimit, lideri historik i demokratëve ka thirrur një proteste për datën 8 janar ku ka paralajmëruar se do të drejtojë anëtarësinë drejt selisë blu për të nxjerrë kryetarin butësisht nga zyra.
Kjo është protesta e dytë e thirrur nga Sali Berisha në harkun e pak ditëve pas asaj kundër nismës rajonale “Open Balkan”.
Discussion about this post