Kreu i Partisë Demokratike Lulzim Basha, në mbledhjen e Kryesisë zhvilluar këtë të premte, deklaroi se demokratët u treguan të vendosur të vazhdojnë betejën për demokraci.
Sipas Bashës, mbështetësit e PD-së janë të vetëdijshëm se sa e vështirë është përballja me regjimin, duke shtuar se tani çdo hap do të ketë për qëllimin vazhdimin e betejës me të gjitha format dhe se Partia Demokratike është e gatshme për të kryer detyrën e saj për përmbysjen e regjimit një orë e parë.
“Është e domosdoshme që të gjithë ne, nga Kryesia te Këshilli kombëtar, të lexojmë qartë atë që ishte vullneti i demokratëve. Ata e dinë më mirë se ne se çfarë ka ndodhur në 25 prill, ata e dinë më mirë se ne se sa e vështirë është përballja me regjimin. Ndaj çdo hap që do të bëjmë deri në përfundimin e analizës dhe mbledhjen e Kuvendit Kombëtar, duhet të kemi parasysh që demokratët na kërkuan vazhdimin e betejës.
Dhe për të arritur këtë, detyra jonë është të përgatitemi me të gjitha format dhe mjetet për këtë përballje. Një përballje që kërkon që Partia Demokratike të jetë e gatshme për ta kryer detyrën e saj ndaj regjimit një orë e më parë, sepse Shqipëria, shqiptarët dhe demokratët nuk mund të presin deri në 2025”, tha Basha.
